პალერმო ღირსშესანიშნავი არქიტექტურის, საინტერესო ბაზრობების და გასაოცარი კულტურული მემკვიდრეობის მფლობელი ადგილია. ჩვენ შეგიდგინეთ ერთდღიანი ტური, რათა სიცილიის დედაქალაქის დათვალიერება ასეთ მოკლე დროში თავისუფლად მოახერხოთ.
დილა
შეიძინეთ ჯანსაღი პროდუქცია მერკატო დელ კაპოში
პალერმოს ბაზრობებზე მუდამ ქაოსი და ხმაურია. შეიგრძენით ხმამაღალი სიცილია დილიდანვე – მერკატო დელ კაპოში. მიირთვით ახალთახალი პროდუქტები ან მათგან დამზადებული სენდვიჩები.
მიირთვით ყავა Casa Stagnitta-ში
ეს პალერმოს ისტორიული კაფეა. ის 1928 წელს გაიხსნა და ყავის ორიგინალი გემოს შენარჩუნებაზე ზრუნავს. Casa Stagnitta ქალაქის ისტორიულ ნაწილშია და ღია ცის ქვეშ კომფორტულ სკამებს გთავაზობთ. აქედან საუკეთესოდ დააკვირდებით ქალაქის გაღვიძებას. შეგიძლიათ ყავას სახლში დამზადებული ნამცხვარი ან კლასიკური კრუასანი მიაყოლოთ.
შუადღე
მოინახულეთ პალერმოს კათედრალი და შეაფასეთ არქიტექტურა
დროა არამარტო პალერმოს, არამედ მთლიანად სიცილიის ყველაზე განახლებულ შენობას ეწვიოთ: პალერმოს კათედრალს. ის 1184 წელს ააშენეს, მაგრამ საუკუნეების მანძილზე იცვლებოდა და სხვადასხვა არქიტექტურული სტილის მიქსს წარმოადგენს. ჯერ დატკბით უზარმაზარი გუმბათით, თაღით და სვეტებით, შემდეგ კი შიგნიდანაც დააკვირდით. ეკლესიაში შესვლა უფასოა, მაგრამ მის გარკვეულ ნაწილებში მცირე გადასახადია დაწესებული.
შეიქმენით საშიში ატმოსფერო კაპუჩინის კატაკომბებში
კაპუჩინის კატაკომბები ამაღელვებელი და პირქუშია. აქ პირისპირ შეხვდებით იმ მეუფის ჩონჩხს, რომელიც ახლოს მდებარე სანტა მარია დელა პასში მსახურობდა. პირველი მუმია აქ ფრა სილვესტრო იყო, თუმცა ახლა მათი რაოდენობა 1000-ს გადასცდა.
საღამო
დალიეთ კოქტეილი მონდელოს სანაპიროზე
პატარა ავტობუსი ქალაქის ცენტრიდან გრძელ და ქვიშიან მონდელოს სანაპიროზე მიგიყვანთ, რომელიც კაფე-რესტორნებითაა სავსე. რომელიმე მათგანში იპოვნეთ მაგიდა ხედით და ზღვიდან მონაბერი სიო შეიგრძენით. შეუკვეთეთ საყვარელი სასმელი, რათა მზის ჩასვლით უკეთესად დატკბეთ.
გაისეირნეთ გვიან ღამით კუატრო კანტის გარშემო
პალერმოში დღე ვახშმის შემდგომი სეირნობით უნდა დაასრულოთ. იტალიელები მას პასეგიატას უწოდებენ. საუკეთესო არჩევანი კუატრო კანტია, რომელსაც ოფიციალურად პიაცა ვიგლიენას უწოდებენ. აქ ქალაქის ორი მთავარი გზა იკვეთება. მოგხიბლავთ თითოეულ კუთხეში წარმოდგენილი 4 შენობა, რომლებიც შადრევნებთან ერთად წელიწადის 4 სეზონის რეპრეზენტაციას ახდენენ. აქაა სიცილიის ერთ-ერთი ესპანელი მეფის ქანდაკებაც.
