საბერძნეთის კუნძული კიმოლოსი მილოსის ჩრდილოეთით მდებარეობს, ეგეოსის ზღვაში და არაოფიციალურად, მსოფლიოში ყველაზე სუფთა წყლის მფლობელი კუნძულის სტატუსს ატარებს. მოგზაურების უმეტესობა, რომელიც კიმოლოსზე ჩადის მისი წყლის სისუფთავეს აფასებს როგორც უმაღლესი ხარისხის მქონეს. მსგავსი შეფასება უკვე 2.5 მილიონზე მეტმა ადამიანმა დაწერა.
კიმოლოსის ჩრდილოეთ ნაწილში პრასას სანაპირო (Prassa Beach) მდებარეობს, თეთრი ქვიშის და წყნარი, სუფთა წყლის კომბინაცია საუკეთესო დასვენებისთვის. მის გარდა, აქ ბევრი ლამაზი და უნიკალური ნაპირია. ჩვენ გირჩევთ ალიკის (Aliki Beach), მავროსპილიას (Mavrospilia Beach), ბონათსას (Bonatsa Beach) და აგიოს ჯორჯოს (Agios Georgios Beach). ალიკი გრძელი ქვიშიანი სანაპიროა, ხოლო მავროსპილია შავი ვულკანური ქვიშით და დრამატული ქვის ფორმაციებით. ბონათსა – პატარა სანაპიროა გამოქვაბულით, საუკეთესო დაივინგისთვის, ხოლო აგიოსი ოქროს ქვიშით და საოცარი ხედებით.
ტურისტებით დატვირთული მეზობლებისგან განსხვავებით, კიმოლოსი ავთენტური ბერძნული კუნძულის გამოცდილებას შეგძენთ. აქ თეთრი შენობები, ქვაფენილიანი ქუჩები და მომხიბვლელი სოფლებია. კუნძულის ვულკანური ნიადაგი უნიკალურ ლანდშაფტს ქმნის და ვიზიტორებს საინტერესო გეოლოგიურ მოვლენებს, ე.წ. უზარმაზარ ქვის სოკოებს სთავაზობს.
კიმოლოსი კუნძულია მდიდარი ისტორიით. ტრადიციის თანახმად, მას კიმოლოსი ეწოდა კუნძულზე პირველი მაცხოვრებლის სახელის საპატივცემულოდ. ანტიკური ხანიდან მოყოლებული ის ბრძოლის ველი იყო ანტიკურ ათენსა და სპარტას შორის.
არ გამოგრჩეთ მისი მთავარი ქალაქის, ქორიოს მომხიბვლელი არქიტექტურა, რომელიც კიმოლოსს საბერძნეთის ერთ-ერთ მნიშვნელოვან მიმართულებად აქცევს, თანაც იმაზე ნაკლები ტურისტული ქაოსით, ვიდრე ეს საბერძნეთის სხვა კუნძულებზეა. აქ ათენის პირაეუსის პორტიდან ბორნით მოხვდებით. ნავები დადიან მილოსიდანაც. მილოსზე შეგიძლიათ ათენიდან გადაფრენაც.
მიუხედავად იმისა, რომ კიმოლოსი ზომით პატარაა, აქ ბევრი სანახაობა გელით. სანაპიროებზე რელაქსაციის შემდეგ, მოინახულეთ ციხესიმაგრე, რომელიც მე-16 საუკუნეშია აგებული. ასევე, კიმოლოსის არქეოლოგიური მუზეუმი ანტიკური არტეფაქტებით. ტაძრებიდან კი მნიშვნელოვანია მეტროპოლიტანის ეკლესია პანაგიაში და ქრისტეს ტაძარი, რომელიც 1592 წელსაა აგებული.
