იტალიის პატარა დასახლება ლერიჩი სულ რაღაც 1200 მუდმივი მაცხოვრებლით, პასტელური ფერის სახლებით, ზღვის ხედებით და მშვიდი ბულვარით იწონებს თავს. ის 1 საათის გზაზეა ჩინკე ტერესდან, სადაც ყოველწლიურად 2.4 მილიონი ტურისტი ჩადის. ჩინკე ისეთი პოპულარულია, რომ სეზონის დასაწყისშიც და მიწურულსაც, დისნეილენდივით ხმაურიანი და ქაოტურია. ამიტომაც არაა გასაკვირი, რომ მოგზაურები მის მსგავს ალტერნატივებს ეძებენ. და აი ისიც, ლერიჩი!
რატომ უყვართ ჩინკე ტერე? ერთმანეთზე მშვენიერი ფერადი სახლების, ქვის კიბეების და ვიწრო ხეივნების გამო. ეს ყველაფერი ლერიჩიშიც დაგხვდებათ, თანაც ხალხმრავლობის გარეშე. სარკინიგზო ხაზების ნაკლებობის გამო, ლერიჩი და მის გარშემო მდებარე დასახლებები თითქოს მოწყვეტილები არიან, მაგრამ საავტომობილო გზით აქ თავისუფლად მოხვდებით. თუ თავად არ ქირაობთ მანქანას, გაყევით ავტობუსებს.
ულამაზესი ხედების, პატარა ნავსადგურის, წყლისპირა რესტორნების, პოეტების სანაპიროს გამო აქ მოხვედრა ნამდვილად ღირს. ლერიჩის ავთენტური ატმოსფერო და მდიდარი კულტურული კალენდარი აქვს. აქ ბევრი ღონისძიება და ფესტივალი ტარდება. ადგილობრივები ტურისტებით გადაღლილები არ არიან, რაც ჩინკე ტერეზე ნამდვილად იგრძნობა. კონსულტანტები, გამვლელები, მეთევზეები გესაუბრებიან და თავიანთ გამოცდილებას გიზირებენ.
თუ ჩინკე ტერეს მონახულება მაინც გსურთ, გაეშურეთ ლერიჩიდან იქ ბორნით და 1 დღით ეწვიეთ. თუმცა, პოეტების სანაპიროზე რამდენიმე დღის გატარებაც საკმარისია, რომ არსად წასვლა არ მოგინდეთ.
როგორ მოხვდებით ლერიჩიზე? გენოადან და პიზადან 90 წუთიანი მატარებლის გზით ლა სპეციაში (La Spezia) მოხვდებით, იქიდან კი ავტობუსით ლერიჩიზე.
