ბრიტანიის დედაქალაქი, ულამაზესი რენე ჩრდილოეთ საფრანგეთის კულტურის შესაცნობად მშვენიერი ადგილია. მისი ისტორია რომაული ერიდან მოდის და აქ ბევრი საინტერესო მონუმენტი, მუზეუმი, ლამაზი პარკი და ამაღელვებელი ეკლესიაა. ჩვენ აქ საუკეთესო აქტივობებს და სანახაობებს გირჩევთ.
პარკი – Parc du Thabor
რენეს ჩრდილოეთ ნაწილში მდებარე ამ პარკის დიზაინი მე-19 საუკუნეში შეიქმნა ყოფილი ბენედიქტის სააბატოს ადგილზე. ის აერთიანებს ფრანგულ ბაღს, ინგლისურ ბაღს, ვარდების ბაღს, ბოტანიკურ ბაღს, სათბურს, შადრევნებს… ამ იდილიურ სიმშვიდეში სასიამოვნოდ ისეირნებთ ცენტრის ქაოსის და ხმაურის მიღმა.
ციხესიმაგრე და კოშკი – Duchesne Tower
მესამე საუკუნის რენეს ციხესიმაგრის კედლებში, შუა საუკუნეებით დათარიღებული კოშკი მდებარეობს. ყოფილი საარტილერიო ცენტრის გვერდით მდებარე ეს კოშკი ერთ დროს მნიშვნელოვან როლს ასრულებდა ქალაქის დაცვაში.
ბრიტანიის პარლამენტი
ანტიკური რეჟიმის საკულტო სიმბოლო – ბრიტანიის პარლამენტი 1554 წელს დაარსდა და სასამართლო ფუნქციას ასრულებდა. ამ არაჩვეულებრივ შენობაში პარლამენტი 1655 წელს გადმოვიდა და თავის ფუნქციას 1790 წლის ფრანგულ რევოლუციამდე ასრულებდა. დღეს აქ რენეს სააპელაციო სასამართლოა, სადაც ტურები გიდების თანხლებით ეწყობა.
მოედანი – La Place des Lices
რენეს ცენტრიდან ჩრდილოეთით მდებარე ეს ცოცხალი მოედანი სავსეა ბრეტონის არქიტექტურის ბრწყინვალე ნიმუშებით. ყოველ შაბათ დილას აქ დიდი ბაზრობები ეწყობა. დაარსებიდან დღემდე ის საფრანგეთის რიგით მეორე უდიდესი ბაზრობაა, სადაც ასობით მეწარმე მთელი რეგიონიდან ჩამოდის. აქ დააგემოვნებთ ცნობილ სიდრას, მარილიან კარაქს, რეინეტის ვაშლებს და აშ.
ეკლესია – Cathédrale St-Pierre
ნეოკლასიკური არქიტექტურის ეს შესანიშნავი ნიმუში მე-19 საუკუნეში ააგეს, მაგრამ ამ ადგილის ისტორია მე-6 საუკუნიდან იწყება. წმ. პიერის კათედრალი ნამდვილად ღირს მონახულებად. მისი გასაოცარი ექსტერიერი ისეთივე გასაოცარ ინტერიერს მალავს, განსაკუთრებით მოგხიბლავთ ჭერის დეკორი.
ცენტრი – Les Champs Libres
რენეს გულში მდებარე ეს ცენტრი თანამედროვე არქიტექტურის მშვენიერი ნიმუშია. ეს კულტურის ჰაბი აერთიანებს ცენტრალურ ბიბლიოთეკას, ბრიტანიის მუზეუმს და სამეცნიერო ცენტრს, მათ შორის პლანეტარიუმს. წლის განმავლობაში აქ დროებითი გამოფენები ხშირად იმართება.
გალერეა – Eleven Art Gallery
ეს უნიკალური ადგილია ფოტოგრაფიის და ხელოვნების მოყვარულთათვის. მის სივრცეებში საშუალება ეძლევათ გამოფინონ საკუთარი ნამუშევრები როგორც პროფესიონალ ფოტოგრაფებს, ასევე მოყვარულებს.
სახვითი ხელოვნების მუზეუმი – Musée des Beaux-Arts
ფრანგული რევოლუციის დროს დაარსებული მუზეუმი მდიდარი ისტორიით გამოირჩევა. აქ ხელოვნების ბრწყინვალე ნიმუშები დაგხვდებათ. დაიწყებული ანტიკური ეგვიპტის ნიმუშებიდან დამთავრებული თანამედროვე ხელოვნების კოლექციებით. აქ იხილავთ ლეონდარდო და ვინჩის და რემბრანტის ჩანხატებსაც.
ტაძარი – L’Eglise Notre Dame en Saint-Melaine
მშვიდი ტაბორის პარკის მიმდებარედ მდებარე ეს ეკლესია რენესთვის კულტურულად მნიშვნელოვანი ძეგლია. შენობა არქიტექტურულად ძალიან საინტერესო კონსტრუქციაა, რადგანაც წარმოადგენს რომაული, გოთკური და ნეოკლასიკური სტილის შერწყმას. ინტერიერი არანაკლებ შთამბეჭდავია თავისი მე-15 საუკუნის ქრისტეს ნათლობის ფრესკით.
ქართული ტურისტული კომპანია და სამოგზაურო ბლოგი. ვაწყობთ ჯგუფურ და ინდივიდუალურ ტურებს.
