აქტიური ვულკანების, ნისლიანი სოფლების და დიდი მემკვიდრეობის მქონე კუნძული ლუზონი ფილიპინების მრავალფეროვან სახეს წარმოგვიდგენს. ჩრდილოეთიდან სამხრეთამდე გადაჭიმული მთები ბრინჯის ველებით და შიგადაშიგ დიდი ძეგლებით, არქიპელაგის ყველაზე დიდ კუნძულს ქმნის.

ინტრამუროსი, მანილას ისტორიული გული

ქვის ნანგრევებით და ციხეებით გარშემორტყმული ინტრამუროსის უბანი ესპანური კოლონიზაციის დროს პოლიტიკური და რელიგიური გული იყო. მეორე მსოფლიო ომის დაბომბვის შემდეგ ის ახლიდან ააშენეს და დღეს აქ უნიკალურ ატმოსფეროს შეიგრძნობთ. მოინახულეთ მანილას კათედრალი, ციხესიმაგრე სანტიაგოს გალერეები და სან ავგუსტინის ეკლესიის მიდამოები.

ბატადის ბრინჯის ტერასები, იუნესკოს სიაში შესული შედევრი

სოფელ ბატადში ბრინჯის ველების ამფითეატრი მდებარეობს. დაახლოებით 2000 წლით დათარიღებულ ტერიტორიაზე ადგილობრივები ბრინჯს ზრდიან. ხედები აქ სუნთქვაშემკვრელია, განსაკუთრებით აპრილიდან ივნისამდე.

ქალაქი ვიგანი, რომელიც დროში გაიყინა

კუნძულის დასავლეთ სანაპიროზე მდებარე ქალაქი ვიგანი ლუზონის ყველაზე ლამაზი კოლონიალური დასახლებაა. ის მე-17 საუკუნის ანდალუსიურ ქალაქებს წააგავს. ისტორიულ ცენტრში ბევრი არაჩვეულებრივი სახლია ხის აივნებით და წითელი სახურავებით. ზოგიერთი მათგანი მუზეუმადაა ქცეული. წმ. პავლეს კათედრალი და ბენტეის კოშკი ქალაქის რელიგიურ როლს უსვამს ხაზს ესპანური მმართველობის ეპოქიდან.

მაიონის ვულკანი, მაგიური სილუეტი არქიპელაგის თავზე

მაიონი ჯერ კიდევ აქტიური ვულკანია ზღვის დონიდან 2463 მეტრზე. აქ ყველაზე გამანადგურებელი ამოფრქვევა 1814 წელს მოხდა. შედეგს ეკლესიის ნანგრევებად იხილავთ, რომელიც დღემდე მიწასთანაა გასწორებული. დღეს აქ რამდენიმე ბილიკია, რომლებიც ეროვნული პარკის ნაწილს წარმოადგენენ.

ტაალის ტბა, ვულკანური ბაღი

ფილიპინების დედაქალაქიდან, მანილადან 60 კილომეტრში მდებარე ტაგაიტაიში მორიგი აქტიური ვულკანია აღმოსაჩენი – ტაალი. კუნძულზე მდებარე ვულკანი ტბაშია ამოზრდილი და მასზე დაკვირვება ბევრი გადმოსახედიდან შეგიძლიათ.

სიერა მადრე – მწვანე კედელი კუნძულის აღმოსავლეთით

სიერა მადრეს მთაგრეხილს ნაკლებად სტუმრობენ. ის ერთგვარი ბუნებრივი ბარიერია ზღვასთან. მთაშ გამავალ ბილიკებს საუკუნოვან ხეებთან, ხიდებთან და ჩანჩქერებთან მივყავართ. ერთ-ერთ მათგანამდე, დიტუმაბომდე რომ მიხვიდეთ 1 სთ ჯუნგლებში უნდა გაიაროთ.