ახალი ზღვის პროდუქტები, იბერიული ლორი, ტრადიციული კერძები და ფერადი ხილის წვენები: ბარსელონას ერთ-ერთი ყველაზე ცნობილი ბაზარი ამ ქალაქში მოგზაურობისას აუცილებლად სანახავი ადგილია.
ზოგადად, ქალაქის ნამდვილი ხასიათის შესაგრძნობად, ადგილობრივი ბაზრის სტუმრობა ერთ-ერთი საუკეთესო გამოცდილებაა. ხმაურიანი, ცოცხალი და მრავალფეროვანი გარემო, სადაც ადგილობრივები და ტურისტები ერთმანეთს მეგობრულად ხვდებიან, ქვეყნის კულინარიული კულტურის გაცნობის განსაკუთრებულ შესაძლებლობას ქმნის. აქ აღმოაჩენთ ტრადიციულ პროდუქტებს, ადგილობრივ დელიკატესებსა და ესპანური სამზარეულოს მრავალფეროვნებას.
სწორედ ამიტომ, ჟურნალმა “Food & Wine” მსოფლიოს საუკეთესო საკვებისა და სასმელების ბაზრების რეიტინგში ბარსელონას ცნობილი ბაზარი: “Mercat de la Boqueria**”** შეიყვანა.

ისტორიული ბაზარი ბარსელონას გულში
La Boqueria, სრული სახელწოდებით “Mercat de Sant Josep de la Boqueria”, რამბლას მიმდებარედ მდებარეობს და ესპანეთის ერთ-ერთ ყველაზე დიდ და ცნობილ საკვების ბაზრად ითვლება. ყოველდღიურად, კვირის გარდა, მის ფერად დახლებს 40 000-ზე მეტი ადამიანი სტუმრობს: როგორც ადგილობრივი მცხოვრებლები, ისე ტურისტები.
ბაზარი ულამაზესი მინის სახურავის ქვეშაა მოქცეული, რომელსაც რკინის კონსტრუქცია ამაგრებს. მისი ისტორია XIII საუკუნიდან იწყება, როდესაც რამბლას გასწვრივ უბრალო ქუჩის ბაზარი არსებობდა. დღევანდელი იერსახე კი ბაზარს გამორჩეულმა მეტალის კონსტრუქციამ მისცა, რომელიც 1914 წელს ააგეს.

გასტრონომიული გამოცდილება, რომელიც არ უნდა გამოტოვოთ
ბარსელონას ცენტრში მდებარე “La Boqueria” კატალონიური სამზარეულოს ნამდვილ სამყაროში გამოგზაურებთ. აქ დაგხვდებათ ახლად დაჭერილი ზღვის პროდუქტები, იბერიული ლორი, დაძველებული ყველი, ფერადი ხილის წვენები და უამრავი ადგილობრივი დელიკატესი: ყველაფერი, რაც თვალს, გემოსა და სურნელს ერთდროულად აღაფრთოვანებს.
ბაზარში რამდენიმე ადგილი განსაკუთრებით ცნობილია თავისი კერძებით:
- El Quim de la Boqueria – ცნობილია ტორტილებითა და ტრადიციული კერძებით.
- Ramblero – აქ ზღვის პროდუქტებისა და ხმელთაშუაზღვისპირული ინგრედიენტების დაგემოვნება შეგიძლიათ.

თუ ბაზრის ყველაზე ავთენტური ატმოსფეროს შეგრძნება გსურთ, დილით ეწვიეთ, როდესაც აქაურობა განსაკუთრებით ცოცხალია. შეარჩიეთ რომელიმე დახლი, დააგემოვნეთ ადგილობრივი კერძი და უბრალოდ დატკბით ბარსელონას ყოველდღიური ცხოვრებით.
ზოგჯერ ქალაქის გაცნობა სწორედ ერთი ბაზრიდან, ერთი გემოდან და ერთი დაუგეგმავი გაჩერებიდან იწყება.











