მაგიორეს ტბა ელეგანტური სოფლების, ყვავილებით სავსე ხეივნებისა და მშვენივრად შემონახული ისტორიული ცენტრების თავშესაფარია.
მაგიორეს ტბის გარშემო თითოეული სოფელი რეგიონის განსხვავებულ მხარეს წარმოაჩენს. ზოგიერთი თავისი არქიტექტურით იპყრობს ყურადღებას, ზოგი კი სულისშემძვრელი ხედებით, მშვიდი ცხოვრების წესით ან ტბის ისტორიასთან ღრმა კავშირით. თუ მაგიორეს ტბაზე მოგზაურობას გეგმავთ, ეს ხუთი მიმართულება შესანიშნავი საშუალებაა რეგიონის მდიდარი მრავალფეროვნების გამოსააშკარავებლად.
კანობიო: ავთენტური ხიბლი
კანობიო მაგიორეს ტბის ერთ-ერთი ყველაზე მომხიბვლელი სოფელია თავისი სიცოცხლით სავსე სანაპიროს, ფერადი სახლებისა და კოლორიტული ძველი ქალაქის წყალობით. პიდმონტის სანაპიროზე, შვეიცარიის საზღვართან ახლოს მდებარე ეს ადგილი ავთენტურ ატმოსფეროს ქმნის, რაც ერთნაირად იზიდავს როგორც ტბის ერთგულ სტუმრებს, ისე გამოცდილ მოგზაურებს.
მისი ხიბლის საუკეთესოდ აღმოსაჩენად საკმარისია ისეირნოთ ქვაფენილიან ქუჩებში, მოედნებსა და კაფეებით სავსე ტბისპირა ბულვარში. კანობიო ასევე ცნობილია ყოველკვირეული ბაზრობით, პლაჟებითა და საფეხმავლო ბილიკებთან მარტივი წვდომით, რაც მას იდეალურ მიმართულებად აქცევს კულტურული მემკვიდრეობის მოსანახულებლად, ცურვისთვის თუ მთის პანორამებით დასატკბობად.
კანერო რივიერა: მშვიდი და აყვავებული სოფელი
კანერო რივიერა ცნობილია თავისი მშვიდი ატმოსფეროთი და უჩვეულოდ რბილი კლიმატით. პალმის ხეები, ლიმონის ბაღები, ფერადი ფასადები და ყვავილებით სავსე ბაღები ქმნიან ნათელ, თითქმის ხმელთაშუაზღვისპირულ გარემოს, მიუხედავად იმისა, რომ იგი ალპების ძირში მდებარეობს. ეს ბუნებრივად რბილი ჰავა სოფლის იდენტობის მთავარი ნაწილია და მის მიმზიდველობასაც სწორედ ის განაპირობებს.
ტბისპირა ხეივანი ერთ-ერთი ყველაზე სასიამოვნოა მთელს მაგიორეს ტბაზე. სტუმრები აქ კაფის ტერასებზე დასასვენებლად ან ახლომდებარე პატარა სანაპიროებისთვის ჩამოდიან. ნაპირთან ახლოს, ტბაში აღმართული კანეროს ციხესიმაგრის ნანგრევები ლანდშაფტს რომანტიკულ და საიდუმლოებით მოცულ შტრიხს მატებს, რაც კიდევ უფრო ამშვენებს ამ საყვარელ ტბისპირა ადგილს.
ასკონა: შვეიცარიული დახვეწილობა ტბაზე
მაგიორეს ტბის შვეიცარიულ სანაპიროზე მდებარე ასკონა სრულიად გამორჩეულ ატმოსფეროს გთავაზობთ. იგი ოსტატურად აერთიანებს წარსულში მეთევზეთა სოფლის ხიბლს, თანამედროვეობაში კი ელეგანტური კურორტის დახვეწილობას. მისი სანაპირო ზოლი, სადაც პასტელურ შენობებსა და კაფეს ტერასებს შეხვდებით, ერთ-ერთი ყველაზე ფოტოგენურია მთელ ტიჩინოში. აქაური გარემო მშვიდი, ელეგანტური და ტბისპირა ცხოვრების სიამოვნებაზეა ორიენტირებული.
ბულვარის მიღმა აუცილებლად ღირს ისტორიული ცენტრის აღმოჩენა თავისი ვიწრო ხევნებით, დამალული ეზოებითა და ხელოვნების გალერეებით. იტალიური გავლენებისა და შვეიცარიული დახვეწილობის სინთეზით, ასკონა იდეალური გაჩერებაა იმ მოგზაურებისთვის, რომლებიც ეძებენ სიცოცხლით სავსე, თუმცა ელეგანტურ ადგილს, რომლის ფეხით მოვლაც მარტივია.
ავენო: ისტორიული მემკვიდრეობა
ბავენოს ხშირად ხედების გამო აქებენ, თუმცა მისი მიმზიდველობა სცილდება უბრალო პანორამებს. მაგიორეს ტბის დასავლეთ სანაპიროზე მდებარე ეს სოფელი ამაყობს მდიდარი ისტორიული ცენტრით, საუკუნოვანი ნაგებობებით, რომანული ეკლესიითა და მჭიდრო კავშირით ვარდისფერ გრანიტთან, რომელიც მიმდებარე ტერიტორიაზე მოიპოვება.
ეს გამორჩეული ქვა, რომელიც ადგილობრივ არქიტექტურაში ყველგან თვალსაჩინოა, ასახავს ბავენოს მნიშვნელოვან როლს რეგიონის არქიტექტურაში. მის ქუჩებსა და სანაპიროზე სეირნობისას აღმოაჩენთ ისტორიისა და დახვეწილობის ჰარმონიულ შერწყმას, ასევე მარტივ წვდომას მაგიორეს ტბის ყველაზე ცნობილ ღირსშესანიშნაობებთან, მათ შორის: იზოლა ბელასთან, იზოლა მადრესთან და იზოლა დეი პესკატორისთან.
ანჯერა: ტბისპირა ქალაქი ციხესიმაგრის ჩრდილში
მაგიორეს ტბის ლომბარდიის სანაპიროზე მდებარე ანჯერას ხშირად მომხიბვლელ სოფლად მოიხსენიებენ, თუმცა მას მცირე ქალაქადაც მიიჩნევენ. ეს განსხვავება ზუსტად ასახავს მის ხასიათს: საკმარისად ცოცხალია იმისთვის, რომ შემოგვთავაზოს სხვადასხვა ატრაქციონები და კომფორტი, და ამავდროულად საკმარისად მყუდროა წყლის პირას მშვიდი ატმოსფეროს შესანარჩუნებლად.
მისი მთავარი სავიზიტო ბარათია როკა ბორომეო- შთამბეჭდავი შუა საუკუნეების ციხესიმაგრე, რომელიც ტბას გადაჰყურებს და ლომბარდიის სანაპიროზე ერთ-ერთ საუკეთესო პანორამულ ხედს გვთავაზობს. მის ქვემოთ ანჯერა აერთიანებს სასიამოვნო ტბისპირა ბულვარს, თავშეკავებულ ისტორიულ ცენტრსა და უფრო მშვიდ გარემოს, ვიდრე ტბის სხვა ცნობილი კურორტები. ეს იდეალური გაჩერებაა მათთვის, ვისაც სურს გამოცადოს მაგიორეს ტბის უფრო მშვიდი და კულტურული მემკვიდრეობით მდიდარი მხარე.
