ედინბურგში ქალაქის გამორჩეული არქიტექტურით ისიამოვნებთ, რომელიც ვიზიტორებს საოცრად ხიბლავს. ძველ ქალაქში მდებარე მასშტაბური გოთიკური ძეგლები და ქვაფენილიანი ქუჩები, შოტლანდიის დედაქალაქს დიდი ბრიტანეთის უნიკალურ ქალაქად აქცევს. ქალაქის ცენტრი პატარაა, მაგრამ ბევრი აღმართით. საუკეთესო სეზონია ზაფხული, როცა აქ ფესტივალები ტარდება და ულამაზეს მწვანე სივრცეებს უფრო თამამად გამოიკვლევთ.
გაისეირნეთ სამეფო ქუჩაზე
The Royal Mile – ედინბურგის ძველი ქალაქის ქუჩაა, რომელიც მის ნამდვილ ატმოსფეროს გამოხატავს. ის ტურისტული ცენტრია და ისტორიულ მონუმენტებს აერთიანებს, მაგალითად კათედრალს, სამეფო სასახლეს და ედინბურგის ციხესიმაგრეს მთაზე. შეგხვდებათ სუვენირების მაღაზიები და მშვიდი პაბები.
მოინახულეთ ედინბურგის ციხესიმაგრე
ედინბურგის ციხე სტრატეგიულ ლოკაციაზე მდებარეობს და საუკუნეებს ითვლის. ის დიდი ბრიტანეთის ერთ-ერთი უძველესი ციხესიმაგრეა და დიდი ისტორიით გამოირჩევა. შეუერთდით ტურებს მისი ინტერიერის დასათვალიერებლად. ღიაა დილის 10 საათიდან 5 საათამდე.
დაათვალიერეთ შოტლანდიის ეროვნული მუზეუმი
შოტლანდიის ეროვნულ მუზეუმში 12 მილიონზე მეტი ნივთი ინახება. განსაკუთრებით შთამბეჭდავია დიდი გალერეა – მაღალი ატრიუმი შუშის ჭერით. აქ შესვლა უფასოა. შეგიძლიათ გადმოწეროთ მუზეუმის აპლიკაცია და მიიღოთ საჭირო ინფორმაცია. ღიაა 10-დან 5 საათამდე.
გადმოხედეთ ედინბურგს ზევიდან
Arthur’s Seat – დასალაშქრად არც ისე მარტივი ასავლელია, მაგრამ ედინბურგის პანორამული ხედებით ნამდვილად დაგატკბობთ. დაიწყეთ სიარული ჰოლირუდის სასახლიდან და გზის დაფარვას 1 საათში შეძლებთ. აქ პრეისტორიული ნანგრევებიც დაგხვდებათ.
მზის ჩასვლას კი უყურეთ კალტონის მთიდან
Calton Hill – 103 მეტრი სიმაღლის რომანტიკული გადმოსახედია ედინბურგში. ის მშვენიერი ადგილია მზის ჩასვლის სანახავად. გირჩევთ მონუმენტზე დაისამდე 1 საათით ადრე ახვიდეთ.
მოიხიბლეთ ჰოლირუდის სასახლით
Palace of Holyroodhouse – შოტლანდიელი მონარქების ოფიციალური რეზიდენციაა, რომელიც მე-17 საუკუნით თარიღდება და გასაოცარი ინტერიერითა და ექსტერიერით გამოირჩევა. შიდა სივრცეში ნახავთ იტალიურ რენესანსის მხატვრობასაც. ღიაა ყოველდღე სამშაბათის და ოთხშაბათის გარდა.
გაისეირნეთ ედინბურგის სამეფო ბოტანიკურ ბაღში
Royal Botanic Garden of Edinburgh – მე-17 საუკუნის ბაღია, რომელიც ზაფხულში განსაკუთრებით ყვავის. ის ევროპულ, აზიურ და ამერიკულ მცენარეთა ჯიშებს წარმოგვიდგენს. გამოიკვლიეთ ვიქტორიანული შუშის და ტროპიკული სახლიც. ღიაა ყოველდღე 10-დან 5-მდე.
იხილეთ თანამედროვე ხელოვნების შედევრები შოტლანდიურ ეროვნულ გალერეაში
Scottish National Gallery of Modern Art – 1900 წლით დათარიღებული მუზეუმია თანამედროვე ხელოვნების ნიმუშებით. ორ შენობაში დაახლოებით 6000 ნახატი, სკულპტურა და არტ ინსტალაციაა განთავსებული. ნახავთ პიკასოს, დალის, მაგრიტის და მატისეს შემოქმედებასაც. დაკეტილია ორშაბათს, სამშაბათს და ოთხშაბათს.
ადით სკოტ მონუმენტზე
Scott Monument – ეს ელეგანტური ვიქტორიანული ძეგლია, საკულტო გოთიკური ნაგებობა, რომელიც ქალაქის ცენტრში მდებარეობს. 61 მ. სიმაღლის მონუმენტი გადმოსახედ პლატფორმას გვთავაზობს, რომელზეც სპირალური კიბეებით ახვალთ. ღიაა ყოველდღე.
მოიარეთ ლეიტი
Leith – ედინბურგთან მდებარე სანაპირო უბანია, სადაც ბევრ რამეს ნახავთ, მათ შორის დედოფალი ელიზაბეთის რეზიდენციას. ლეიტში მდებარეობს ედინბურგის უდიდესი სავაჭრო ცენტრიც.
დაესწარით ფესტივალს
Edinburgh Festival Fringe – კომედიური ფესტივალია, რომელიც მსოფლიოს საჯარო კულტურულ ღონისძიებებს შორის გამორჩეულ ადგილს იკავებს. ეს ერთთვიანი ფესტივალი ედინბურგში ყოველი წლის აგვისტოში ტარდება. წარმოდგენები, სთენდაფები, ცეკვები და სხვა პერფორმანსები ძველი ქალაქის ქუჩებშია მიმოფანტული.
მიიღეთ შოტლანდიური ვისკის გამოცდილება
ედინბურგში აუცილებლად უნდა დააგემოვნოთ შოტლანდიური ვისკი. ჩვენ გირჩევთ შეუერთდეთ ვისკის ტურს, რომელიც ამ სასმლის ისტორიას გაგაცნობთ და სხვადასხვა ვისკის გასინჯვის საშუალებას მოგცემთ.
