პორტუგალიის ეს სანაპირო თავისი თეთრი სახლებით ყველაფერია, რაც პორტუგალიაში საუკეთესო არდადეგებს გაგატარებინებთ: მშვიდი წყლები, ოქროს ქვიშები, ზღვის რესტორნები და სასეირნო ადგილები. თუ აქტიური დასვენება გსურთ, მიაკითხეთ სათავგადასავლო პარკებს და ღამის კლუბებს. თუ სიმშვიდე გსურთ, იპოვნეთ ფავორიტი სანაპირო. ჩვენ აქ დასვენების რჩევებს მოგცემთ.
სანაპირო: პრაია დე საო რაფაელი/Praia de São Rafael
ოქროს ქვიშა, კარამელის შეფერილობის კლდეები და ზღვის რესტორნები – საო რაფაელის სანაპირო არის ადგილი, სადაც პორტუგალიელები მიდიან საბანაოდ და გასარუჯად. ზაფხულობით ის სრულიად სავსეა, მაგრამ თუ 10 საათამდე მიხვალთ, კარგ ადგილს გამონახავთ.
ქუჩა: The Strip
ნეონის განათებებით, მხიარული მუსიკით, გასართობი აქტივობებით და უამრავი ბარ-რესტორნით, ალბუფეირას მთავარი ღამის ცხოვრების ქუჩა სტრიპი ლას-ვეგასს მოგაგონებთ. აქ მშვიდ საღამოს ვერ გაატარებთ, რადგანაც გარშემო სულ წვეულების განწყობაა. კლუბ “სამოთხეში” შესაძლოა დილამდეც იცეკვოთ.
სანაპირო ზოლი: პრაია და ფალესია/Praia da Falésia
თუ ზღვის გასწვრივ სეირნობა გსურთ, აქ 5 კილომეტრი სიგრძის სანაპირო ზოლი დაგხვდებათ. საუკეთესო დრო ვიზიტისთვის გვიანი შუადღეა, ამ დროს მზე ოქროსფერ შეფერილობას იღებს და ზღვას უახლოვდება. მთლიანი სანაპიროს დასაფარად 2 საათი დაგჭირდებათ, შეგიძლიათ გზად პორტუგალიური ტაპასის მისართმევად ან ლუდის დასაგემოვნებლად შეჩერდეთ.
ხეივანი: Jardim Público de Albufeira
ალბუფეირა ერთ დროს მძინარე სათევზაო დასახლება იყო და დღეს ამ ატმოსფეროს კაფეებითა და პალმებით გაწყობილ ამ ლოკაციაზე იპოვნით: ძველი ქალაქის შუაგულში. ქვაფენილიანი ქუჩები თეთრ კოტეჯებს და თაღებს წარმოგიდგენენ. აქ რამდენიმე ტრადიციული რესტორანია ზღვაზე ხედით.
ეკლესია: საო სებასტიაო/Igreja de São Sebastião
როცა ალბუფეირა სათევზაო სოფელი იყო, ეს მე-18 საუკუნის თეთრი ტაძარი ადგილობრივი საზოგადოების საკულტო ძეგლს წარმოადგენდა. დატკბით როკოკოს არქიტექტურით ბაროკოს დეტალებით და გასაოცარი სკულპტურებით. აქაური რელიქვიები რეგიონის მიტოვებული ეკლესიებიდანაა შეგროვებული.
სანაპირო: Praia dos Pescadores
ალბუფეირას მთავარი სანაპირო ნახევარმთვარის ფორმისაა და 2 კილომეტრზეა გაჭიმული. აქ თითქოს ქალაქი ნაზად ხვდება ზღვას. ეს სანაპირო არამხოლოდ ალბუფეირას, არამედ მთელი პორტუგალიის ცნობილი ურბანული ნაპირია. ოქროსფერი ქვიშა, წყნარი ტალღები, ბრწყინვალე მზის ჩასვლა და სიახლოვე ყველაფერთან – ადგილს იდეალურს ხდის დასასვენებლად. ძველი ქალაქიდან აქ პირდაპირ მოხვდებით.
აკვაპარკი დელფინარიუმით: Zoomarine Algarve
პორტუგალიის ეს უზარმაზარი წყლის პარკი დელფინების შოუს, სასრიალოებს, საცურაო აუზებს ყველა ასაკისთვის, აკვარიუმებს, ხელოვნურ სანაპიროებს, პატარა კინოთეატრს, გასარუჯ სივრცეებს და ეშმაკის ბორბალს წარმოგვიდგენს.
პარკი: Parque Aventura
ზიპლაინები, სასეირნო ბილიკები, თოკების ხიდები და სხვა – ამ სათავგადასავლო პარკში სხვადასხვა სირთულის აქტივობებს გადააწყდებით.
